JAUREGI (Zerain)

Gipuzkoako baserrietako batzuek Erdi Aroko dorretxeak integratu dituzte beren egituran. Jauregi baserria da horren adibide argia. Zeraingo herrigune txikian dago. Argazkiaren lehen planoan harlanduzko paretak ikus daitezke eta arku zorrotzeko ate bat. Alde hori dorretxe zaharrari dagokio. Zerain familia zen haren jabea, armarria atearen gainean ikus daiteke gaur egun ere. Ate-zangoetan latinezko inskripzio batzuk irakur daitezke: AVE MARIA GRATIA PLENA (ezkerraldean) eta DOMINUS TECUM BENEDICTA TU (eskuinaldean). Harlandu bat ere badago, interpretatzen zailak diren hainbat astro-sinbolo azaltzen dituena.

Gainerako paretak garai ezberdinetan egindako handitzeen emaitza dira. Batzuk adreiluz betetako zurezko bilbaduran oinarritu dira, eta beste batzuk ohiko harlangaitzean.

Argazkia: JAS,  1999

Lekua: Zerain (Gipuzkoa).