CARLOS FONTANA

“San Esteban parroki-eliza”

Elizalde auzoan, Lertaungo San Esteban parroki-eliza dago. Antza denez, toki horretan bertan, kapera bisigotiko bat zegoen Erdi Aroan, eta X.-XII. mendeetan eliza erromaniko batek ordezkatu zuen. San Esteban eliza nabe bakarrekoa da (gotikoa da, eta 1522. urtean amaitu zen), eta gurutzeria-ganga batzuk dauzka, denborarekin zati asko erantsi zaizkienak suteen ondorioz.

Osagaien artean, hauek dira aipagarrienak: absidea, aldare nagusiko erretaula barrokoa (Juan Huici, 1629-1640), San Martinen eta Santa Katalinaren aldareak (Jose de Zuaznabar, 1730), pulpitua (1721-1775), sakristiaren tiraderak eta koruko aulkiteria (Sebastian Lekuonarenak biak).

Dorrea (XVI. mendekoa) Nikolas de Lizarragak diseinatu zuen. Oinplano karratua, gotorleku-itxura eta 40 metroko garaiera du. Hasiera batean, atari bat zeukan sarreran; baina, toki txarrean zegoenez, itxi egin zen, eta Kristo Santuaren kapera jarri zen haren ordez. Kapera horretan, pasabide bat ikusten da goialdean, balkoi bat duena; kupula batek estaltzen du multzo hori guztia.

Argazkia: JAS, 2005

Tokia: Oiartzun. Elizalde auzoa.